Translation of "English" into Shan

တပ်ႉသိုၵ်းၸိုင်ႈတႆး RCSS/SSA လႄႈ သိုၵ်းမၢၼ်ႈ ပဵၼ်ပၢင်တိုၵ်းၵၼ် ႁၢဝ်ႈႁႅင်း ၼႂ်းၸႄႈဝဵင်းမိူင်းၼွင် မိူဝ်ႈၼႆႉ ၶွင်ႇသီႇဢဝ်ၶိုၼ်းၸိုင်ႈတႆး RCSS လႄႈ ၶွမ်ႇမတီႇတူဝ်တႅၼ်းသၽႃးမိူင်းႁူမ်ႈတုမ် (CRPH) ဢုပ်ႇဢူဝ်းၵၼ် ၵဵဝ်ႇလူၺ်ႈလွင်ႈၵၢၼ်မိူင်း ဢၼ်ပဵၼ်ယူႇယၢမ်းလဵဝ်သေ ထုၵ်ႇသိုၵ်းမၢၼ်ႈ ပိုတ်ႇၼႃႈသိုၵ်းၸူး တပ်ႉသိုၵ်းၸိုင်ႈတႆး RCSS/SSA လႄႈ သွင်ၽၢႆႇပဵၼ်ပၢင်တိုၵ်းၵၼ် တၢင်းႁိုင်ၼိုင်ႈၸူဝ်ႈမူင်းပၢႆ။ မိူဝ်ႈၼႆႉဝၼ်းထီႉ 9 March 2021 (လိူၼ်သၢမ်လွင်ႈ 11 ၶမ်ႈ ပီႊတႆး 2115 ၼီႈ) ယၢမ်းဝၢႆးဝၼ်း 16:00 မူင်း သိုၵ်းမၢၼ်ႈ ႁႅင်းသိုၵ်းတင်းၼမ် လူင်းၵႂႃႇၸွမ်းၽင်ႇၼမ်ႉသၢမ်ၵေးသေ ၵႂႃႇပိုတ်ႇၼႃႈသိုၵ်းၸူး တပ်ႉသိုၵ်းၸိုင်ႈတႆး RCSS/SSA ဢွၼ်တၢင်း တီႈၽၢႆႇႁွင်ႇဝၢၼ်ႈႁူဝ်တၢတ်ႇ ဢိူင်ႇၼွင်ဢေ ၸႄႈဝဵင်းမိူင်းၼွင် ၸႄႈတွၼ်ႈလွႆလႅမ် ၸိုင်ႈတႆးပွတ်းၸၢၼ်း လႄႈ သွင်ၽၢႆႇပိုတ်းယိုဝ်းၵၼ် ႁၢဝ်ႈႁႅင်းသေ သဵင်ၵွင်ႈသဵင်မၢၵ်ႇယဵၼ်ၵႂႃႇမိူဝ်ႈယၢမ်းႁူဝ်ၶမ်ႈ 17:16 မူင်း ယူႇယဝ်ႉ။ မိူဝ်ႈၼႆႉသမ်ႉ ပဵၼ်ဝၼ်းဢၼ် ၶွင်ႇသီႇဢဝ်ၶိုၼ်းၸိုင်ႈတႆး RCSS လႄႈ ၶွမ်ႇမတီႇတူဝ်တႅၼ်းသၽႃးမိူင်းႁူမ်ႈတုမ် (CRPH) ႁူပ်ႉထူပ်းဢုပ်ႇဢူဝ်းၵၼ် တႃႇၵႄႈလိတ်ႈပၼ်ႁႃ ၵၢၼ်မိူင်း ဢိၵ်ႇတင်း ပိၼ်ႇပၢႆႈသပ်းလႅင်းၼႄၵၼ် လွင်ႈၵၢၼ်လႆႈႁဵတ်းသၢင်ႈမႃး ဝၢႆးသိုၵ်းမၢၼ်ႈ ယိုတ်းဢၢမ်းၼၢတ်ႈၼႆႉၼႆယဝ်ႉ၊ ၽွင်းယၢမ်းၼင်ႇၼႆသမ်ႉ ၽၢႆႇသိုၵ်းမၢၼ်ႈ ဢဝ်ႁႅင်းသိုၵ်းသေ ပိုတ်ႇၼႃႈသိုၵ်းၸူး RCSS/SSA ၼႆႉ တေလႆႈႁၼ်ဝႃႈ သိုၵ်းမၢၼ်ႈ ဢမ်ႇၶႂ်ႈႁႂ်ႈၵၢၼ်မိူင်း မိူင်းႁူမ်ႈတုမ်ၵတ်းယဵၼ် လႄႈ တင်ႈၸႂ်ၶႂ်ႈယႃႉၵဝ်းႁႂ်ႈဝၢၼ်ႈမိူင်းသုၵ်ႉသၢၵ်ႉၵူၺ်း ယူႇယဝ်ႉ။ ၵဵဝ်ႇလူၺ်ႈလွင်ႈ သိုၵ်းမၢၼ်ႈ လူင်းၸွမ်းၽင်ႇၼမ်ႉသၢမ်ၵေးသေ ၶဝ်ႈၵႂႃႇၼႂ်းၼႃႈတီႈ တပ်ႉသိုၵ်းၸိုင်ႈတႆး RCSS/SSA ၵုမ်းၵမ်ၼႆႉ ပွၵ်ႈၼႆႉၵေႃႈ သိုၵ်းမၢၼ်ႈ ဢမ်ႇယွမ်းပွင်ႇလႅင်းၸူး လုမ်းၵပ်းသၢၼ် RCSS သေ တင်ႈၸႂ်ပူၼ်ႉပႅၼ်ပႃး လိၵ်ႈႁူမ်ႈမၢႆ NCA တွၼ်ႈ 3 ၵၼ် 3 မၢႆ 8 ႁူဝ်ၶေႃႈ “သုၼ်လႆႈလွင်ႈၵႂႃႇမႃးလွတ်ႈလႅဝ်းၶွင်လုၵ်ႈတပ်ႉ“ ၼႆႉယူႇယဝ်ႉ။ ၵဵဝ်ႇလူၺ်ႈလွင်ႈပၢင်တိုၵ်းသေ မိူဝ်ႈလဵဝ်ၵေႃႈတိုၵ်ႉပဵၼ်ၽွင်းသုၵ်ႉသၢၵ်ႉ ၶဵင်ႈၶႅင်ၵၢၼ်သိုၵ်း ၵၼ်ဝႆႉယူႇ လႄႈ ဢမ်ႇပႆႇလႆႈႁူႉၸွမ်း လွင်ႈတိူဝ်ႉမၢတ်ႇၸဵပ်း သိုၵ်းသွင်ၽၢႆႇသင်၊ တီႈဝဵင်းမိူင်းၼွင်ၼႆႉ တေမီးသိုၵ်းမၢၼ်ႈ တပ်ႉၶလယ − 9 လႄႈ ၶလယ − 286 ပၵ်းတပ်ႉဝႆႉသေ ယူႇၽၢႆႇတႂ်ႈၵုမ်းၵမ် ၽႅၼ်ၵၢၼ်ယၼ်ႇသိုၵ်း (ၸၵၶ) – 2 မိူင်းၼွင် တိူင်းသိုၵ်းဝၼ်းဢွၵ်ႇၵၢင် (ယလၶ) ဝဵင်းၶူဝ်လမ်။ တပ်ႉသိုၵ်းၸိုင်ႈတႆး RCSS/SSA ပဵၼ်ၸုမ်းဢၼ်သၢၼ်ၶတ်းသိုၵ်း