Translation of "cemel" into Arabic

Devedir. Etini kılye itseler zeytle ve büberle ve kemnûnla muharrâ bişürüb yiseler üzerine meypuhte içseler cimâ‘ı be-gâyet kavî ide. Zekeri muhkem kıvâma getüre. İnzâlden sonra dahi sâkin olmaz. Evet galîzdir, geç hazm olur. Ve sevdâvî hılt hâsıl eyler. Gerekdir ki yedikden sonra birazcuk hareket ide. Andan sonra sol yanına yata uyuya. Çok yimek yaramazdır. İçi kızdırır. Ve mi‘deyi alevlendirdiğin giderir. Eğer rub‘ ısıtması tutan ve yanı başı ağrıyan ve ırku’n-nisâsı olan sirkesiz muharrâ bişürüb yise fâide ide. Evet gayrı kişiler sirkeyle bişürüb yimek yeğdir. Eğer etini göyündürüb demregüye ursalar fâide ide. Eğer öykenini ısıcak iken çığıda ursalar giderir. Mücerrebdir. Evet öykenini çok yiseler gözsüz ider. Eğer kanın kurutsalar sahk idüb buruna üfürseler kanın kese. Eğer yaku idüb hanâzîr zahmetine ve henglere [beneklere] ve siğillere ursalar be-gâyet fâide ide